9527.net

尋晚亞占士哥同埋亞珍姐嚟到我屋企附近 call 我話同我飲杯嘢喎，我當然係豪不猶豫咁應承佢地啦。換個快衫，跟住就一個箭步出咗去。一落到樓下就已經見到亞占士哥架 Audi A4 Avant 以其極之神秘嘅保護色（簡單啲講，姐喺黑色）哩埋咗喺一邊。我一步一步咁慢慢行過去，我心情固然興奮，但係又有點緊張。終於，行到埋去，一睇，嘩，架車真係好靚，絕對係人間極品！

內籠

一坐到上架車已經發覺 Audi 絕對並不是浪得虛名，無論內籠佈局同用料都真係十分講究，攪到我坐喺亞占士哥架車咁耐，摸足佢 … 架車個內籠咁耐，重要一路摸一路嗌『嘩，好正呀！』、『嘩，好勁呀！』，愈摸愈 high（係愈嗌愈 high 先啱）！跟住我地就去咗鯉景灣飲嘢。

引擎

架 Audi A4 Avant 雖然用同 GTI 一樣嘅 2.0T FSI engine，但係就無 GTI 嗰種爆炸力。可能係因架車比 GTI 重好多，同埋唔係用 DSG 波箱（佢用 Multi-tronic 波箱）嘅關係所至。整體嚟講，架車尚算好力。

避震

占士哥架 A4 係屬於 S-Line 版本，避震比普通版硬，其吸震同反彈表現非常好，硬過 A6 Avant S-Line（可能因為 A6 Avant S-Line 跟 18 吋軨，又要有舒適嘅感覺，所以避震無咁硬），但係又未至於好硬，我覺得 GTI 個避震硬啲、穩定啲。沙板同車胎（車頭）啱啱好有兩隻手指位距離，車身高度適中。

軨，車胎

唔係好明點解 S-Line 版本都只係跟 16 吋軨，唔係話唔夠用，但係就唔係好襯 S-Line 個 image。以 2.0T FSI engine 個 torque 咁高，17 吋軨會適合好多，一來靚仔啲，二來又唔會怕唔夠力。車胎方面使用 Michelin，Michelin 個特性得一個字 … 『靜』，其它特性欠奉，所以高速行駛（尤其係轉彎）時有啲浮。

評論

占士哥架 Audi A4 Avant 個 default setup 已經好正，可以唔洗點改。有時唔係話要改嘢架車先會勁嘅，最靚嘅 setup 其實就係 default setup（以 overall performance 嚟講）。不過如果占士哥都想遲啲 mod 下架車，可以考慮下換 18 吋胎軨先，18 吋胎軨可以增加轉彎穩定性。用 19 吋胎軨雖然係會靚仔啲（我曾經見過一架白色嘅 A4 Avant S-Line 用 19 吋 BBS CH，好鬼靚！），但係我就覺得唔好玩 19 吋喇，因為好易 “r”，又無力。跟住玩到咁上吓先至好諗下換硬啲個避震同 chip 架車，不過最好過咗保養期先好 chip，否則大昌有權唔保。