【明報專訊】民主派立法會議員李柱銘、單仲偕及陳偉業昨日在華盛頓與美國國務卿賴斯會面半小時，會後單仲偕指出，賴斯很關心民主派舉行的「12．4」遊行有多少人上街，亦很同情香港的情況，認同香港可加快民主步伐，以及關心香港何時有普選。她說會密切關注香港民主發展。李柱銘表示，邀請她訪港，了解香港已具備實行普選的質素和條件。
香港人要求全面普選，係正面、正確同有法理依據，但係同美國國務卿賴斯又有乜關係？有人話咁做係想美國更加理解香港目前情況，咁我又唔認同喎。佢地理解完可以做到啲乜？我覺得無囉！當所有決策人都係中國人嘅時候，點解要同美國人傾？尤其民主派人士已經可以同中央有對話嘅時候，點解唔直接反映意見？如果成日話中央唔肯聽取意見，講一次唔聽，可以講兩次三次格，點解要同一個無可能同香港有決策權嘅美國傾先？改善現狀有好多方案，但係同美國傾就一定唔係唯一方法。
我覺得香港需要民主，對經濟、對社會都有好處，但係唔代表我認同那些所謂民主派人士嘅想法同做法。攪遊行攪請願同美國傾已經係民主派人士常用嘅方法，攪幾次無問題，七十萬人上街都無問題，但係如果個個星期年年月月日日都係咁攪就問你死未！知唔知攪一次遊行影響有幾大？會影響到好多食肆、商店做生意、行人、道路使用者等等，對佢地唔公平、唔民主，起碼我見唔到有比個機會佢地選擇。如果攪遊行同美國傾就等同於攪民主嘅話我就一定唔認同。仲有，攪民主唔等於一定要犧牲小我完成大我，點解唔可以雙贏？我覺得喺香港攪民主就好似 sell 嘢咁，要用好多唔同嘅方法先至可以 sell 到您嘅『產品』比人，一個方法唔得，就要用其它方法，但係最難就係要令所有人都開心。
哩個『產品』唔易 sell，有人走出嚟 sell 唔等於佢地識 sell！
註：以上係小弟嘅個人意見，歡迎回覆討論
0 Responses to “政改！普選！賴斯？”